Dagupan City – Mga kabombo! San nga ba aabot ang salitang “antayin mo ang ganti ng isang api?”
Tila napatunayan kasi ito ng isang aso?
Paano ba naman kasi, mukhang iginanti umano ng aso ang kaniyang sarili matapos na gawan ng hindi maganda ng isang lalaking nakasasakyan.
Ayon sa ulat, laking gulat na lamang ng isang driver nang madatnang puno ng gasgas ang ipinarada niyang kotse sa isang eskinita sa Madhya Pradesh, India.
Ang suspek, isa palang aso na gumanti matapos niya itong masagi!
Base sa salaysay ng driver, ikinabigla nito ang nakitang sasakyan kinabukasan, na puno ng gasgas sa harapang bahagi nito.
Sinuri ng lalaki ang CCTV, at nakitang dalawang aso pala ang may pakana nito.
Dito na niya napagtanto na ang nakita niya sa CCTV ay ang asong aksidente niya palang nasagi habang pauwi siya, ngunit paglilinaw ng lalaki na nasa maayos naman umanong kondisyon ang aso at nakatakbo pa ito palayo.
Umabot sa halagang $173 o mahigit P10,000 ang pinsala sa kotse dahil sa mga gasgas na nilikha ng mga aso. Agad namang nag-viral ang video sa social media.
