Dagupan City – Isang delivery rider ang nahuli sa isang buy-bust operation sa Dagupan City matapos magpositibo ang kanyang transaksiyon. Aabot sa sampung gramo ng shabu ang nakumpiska mula sa suspek, na may halagang ₱68,000.00.
Ang suspek ay nakilalang si Jerome Rimarim, isang residente ng Caranglaan, Dagupan City.
Nag-umpisa ang operasyon pasado alas-nueve ng gabi sa Bonuan Binloc. Dito, nahuli ang suspek habang nagsasagawa ng ilegal na transaksiyon ng droga, na nagresulta sa pagkakakumpiska ng dalawang sachet ng hinihinalang shabu.
Sa ngayon, inihahanda na ang kasong isasampa laban sa suspek. Ayon sa mga ulat, si Rimarim ay kabilang sa mga street-level individuals na sangkot sa pagbebenta ng ilegal na droga sa lungsod ng Dagupan. (Justine Ramos)
