Itinuturing na “mother of all chronic diseases” ang diabetes, isang karamdaman na unti-unting nakakaapekto sa pang-araw-araw na gawain at kalidad ng buhay ng isang tao.
Ayon sa mga eksperto, ang hindi aktibong pamumuhay o sedentary lifestyle ay isa sa mga pangunahing dahilan kung bakit tumataas ang panganib na magkaroon ng diabetes.
Ayon kay Dr. Glenn Joseph Soriano, isang US-based doctor at natural medicine advocate, ang diabetes ay isang seryosong sakit kung saan ang antas ng blood sugar ay mas mataas kaysa sa normal.
May dalawang pangunahing uri ng diabetes:
Type 1 Diabetes – isang bihirang kondisyon na karaniwang namamana o nakukuha mula sa kapanganakan dahil sa deperensya sa katawan.
Type 2 Diabetes – mas karaniwan at maaaring makuha sa paglipas ng panahon, lalo na sa mga taong labis ang pagkain ng matatamis at kulang sa ehersisyo.
Ani Dr. Soriano, hindi agad nadidiagnose ang diabetes at kadalasang natutuklasan lamang kapag may mga komplikasyon na ang katawan.
Dahil dito, mahalaga ang maagap na pagkilos at pagbabago ng pamumuhay.
Nagpaalala si Dr. Soriano sa publiko na maging maingat sa diet, partikular sa mga softdrink at pagkaing mataas ang sugar content.
Inirekomenda rin niya ang pagbabawas ng matatamis at regulasyon ng meal consumption upang mapanatili ang tamang blood sugar level.
Dagdag pa niya, ang regular na pisikal na aktibidad at mas balanseng pamumuhay ay malaking hakbang upang maiwasan ang paglala ng sakit.
