Dagupan City – Bilang bahagi ng selebrasyon ng 105th Bugallon Patronal and Town Fiesta 2025, matagumpay na naisagawa sa Bugallon, Pangasinan ang isang Medical, Dental at Blood Donation Activity na naghatid ng libreng serbisyong pangkalusugan sa daan-daang residente.
Ang aktibidad ay naging patunay ng diwa ng malasakit, bayanihan, at serbisyong publiko na ipinagdiriwang taon-taon sa bayan.
Pinangunahan ng MDRRMO Bugallon ang blood letting activity, katuwang ang Philippine Red Cross, habang ang Municipal Health Office, sa pakikipag-ugnayan sa Provincial Health Office at Department of Health, ay naghandog ng libreng medical consultations at dental services.
Layunin ng aktibidad na mas maabot ang mga kababayang nangangailangan ng serbisyong pangkalusugan, lalo na ngayong panahon ng pista.
Maraming residente ang nakinabang sa libreng check-up, dental procedures, at donasyong dugo.
Ayon sa lokal na pamahalaan, ang naturang aktibidad ay hindi lamang bahagi ng kasiyahan ng pista, kundi isang pagpapakita ng tunay na paglilingkod sa komunidad.
Nagpahayag ng taos-pusong pasasalamat ang LGU Bugallon sa mga naging katuwang na ahensya, sa mga health professionals, at sa mga volunteer donors na walang pagod na naglaan ng kanilang oras at serbisyo.
Ani nila, ang tagumpay ng aktibidad ay bunga ng sama-samang pagsisikap at pagmamahal sa bayan.
