Pinaigting ng Dagupan City Disaster Risk Reduction and Management Council (CDRRMC) ang seguridad sa Tondaligan Beach sa Bonuan matapos ang sunod-sunod na kaso ng pagkalunod.
Naitala ang ilang nasawi sa mga nakalipas na buwan, dahilan upang agad na magpatupad ng mas mahigpit na hakbang ang lokal na pamahalaan.
Isinama sa mga inisyatibo ang pagdaragdag ng mga lifeguard at pagtatayo ng karagdagang mga watchtower sa baybayin.
Inanunsyo na mula sa anim ay itataas sa sampu ang bilang ng mga watchtower, habang ang kasalukuyang sampung lifeguard ay magiging labinlima upang mapabilis ang tugon sa mga insidente. Inaasahang libo-libong tao ang bumibisita sa Tondaligan Beach araw-araw, lalo na tuwing weekend, kaya’t mahalaga ang mas mahigpit na pagbabantay.
Hinimok ng LGU ang mga shed owner na makiisa sa pagpapaalala at pagpapatupad ng mga alituntunin sa kaligtasan. Ipinaalala rin ang implementasyon ng “No Swimming Policy” na epektibo mula alas-singko ng hapon, upang maiwasan ang aksidente lalo na kung gabi na at mas mapanganib na ang paglangoy.
