Manpapatuloy so gagaween ya imbestigasyon ed impamatey ed 23 anyos ya estudyante ya nalmoan ya inatey diad loob na abong ya uugipan tonya diad brgy. Pugaro, diad ciudad na Dagupan.
Nanonotan ya akatekleb, akakubot na kawes tan linmarag so lupa to nen anengneng na ina tonyan si Maria Gonzales say anak ton si Jezel Gonzales, nen laen toya ed abong ya uugipan to nen labi na Martes.
Papanisiyaan ya agawa so krimen lablabi la no iner mareenlay labi tan nanaugip laray totoo kanyan anggapoy nangel dan ingal.
Onong ed paunan imbestigasyon na saray otoridad , say biktima so akagamor na sugat diad beklew tan diking tonya.
Kaleganan tonya, walay iaalok ya pabuya so pamilya ya mankantidad na P40,000 ed siopaman ya makapangituro ed saray suspek.
Akabatan ya mangraduate la komon so biktima ed unsublay ya bolan.
