DAGUPAN CITY– Aga ni anta so rason na inpanbikkel na sakey ya Overseas Filipino Worker o OFW ya taga Asingan, Pangasinan tan kaplesan ya mantratrabaho diad Taiwan.
Diad eksklusibon impituyaw na Bombo Radyo Dagupan, kinumpirma nen JunJun Soliven, Secretary nen Ramjit Shahani na Manila Economic and Cultural Office (MECO), suicide so akakarga diad police report ya impawit dad sikato manlapud Taiwan tan anggapo so nanenengneng ya foul play ed impatey na OFW ya si Maribel Soberano, limay bolan ni labat ya mantratrabaho diad abroad.
Walay emben to met ya video ya manpapaneknek ya saya so nanbikkel.
Onong ed say ina na biktima, agga makakaugip na labi si Soberano tan nayarin adepress iya lapud pakakailiw to diad say pamilya to.
Inyarum ni nen Soliven, ya abayagan ira ed impangisempet na bangkay to lapud biek tan biek ya holiday diad Taiwan.
