Pinangunahan ni Victor Wembanyama ang matinding panalo ng San Antonio Spurs laban sa Minnesota Timberwolves, sa iskor na 126-97, upang kunin ang 3-2 abante sa kanilang serye sa ikalawang round ng NBA Playoffs.
Matapos ang kanyang unang career ejection noong Game 4, bumawi si Wembanyama sa isang dominanteng performance matapos magtala ng 27 puntos, 17 rebounds, at tatlong blocks. Dahil dito, isang panalo na lamang ang kailangan ng Spurs upang makapasok sa Western Conference Finals.
Nag-ambag din si Keldon Johnson ng 21 puntos, habang nagtala sina De’Aaron Fox at Stephon Castle ng 18 at 17 puntos ayon sa pagkakasunod. Maaari nang makaharap ng San Antonio ang Oklahoma City Thunder kung mananalo sila sa Game 6 na gaganapin sa Biyernes sa Minneapolis.
Sa panig ng Minnesota, nagtapos si Anthony Edwards na may 20 puntos matapos malimitahan sa walong puntos lamang sa unang kalahati ng laro. Nagdagdag naman sina Julius Randle at Jaden McDaniels ng tig-17 puntos.
Nagbalik si Wembanyama matapos siyang ma-eject sa ikalawang quarter ng Game 4 noong Linggo sa Minneapolis, kung saan nanalo ang Timberwolves, 114-109. Tinawagan siya ng Flagrant 2 foul matapos niyang matamaan ng siko sa leeg si Naz Reid.
Nagpatuloy ang pisikal na labanan ng dalawang koponan sa Game 5. Nakakuha naman ng technical foul si Reid matapos itulak si Wembanyama habang nagsasagawa ng free throw ang Minnesota may 2:24 pa sa unang kalahati.
Lalong naging agresibo si Wembanyama matapos ang insidente. Umiskor siya ng 18 puntos sa unang quarter pa lamang matapos tumira ng 6-of-8 sa field at 2-of-3 mula sa three-point area.
Isa sa mga tampok na eksena sa laro ay nang makawala si Wembanyama para sa isang malakas na windmill dunk matapos magkaroon ng banggaan kasama si McDaniels at lapitan ni Ayo Dosunmu sa unang yugto ng laban.
Sinubukan pang humabol ng Timberwolves sa ikatlong quarter sa pamamagitan ng 14-2 run upang maitabla ang laban matapos mahabol ang dating 18 puntos na kalamangan ng Spurs. Tatlong alley-oop pass din ang kanilang napigilan bago makarating kay Wembanyama.
Gayunman, muling lumayo ang Spurs matapos ang sunod-sunod na magagandang depensa at opensa ni Johnson, kabilang ang pagharang sa tangkang dunk ni Rudy Gobert at isang mahalagang jumper matapos mapigilan si Edwards sa ilalim ng ring.
