Bigo ang mga kaalyado ni Vice President Sara Duterte na makakuha ng malakas na suporta mula sa publiko upang harangin o gipitin ang mga institusyon kaugnay ng nalalapit niyang impeachment trial.
Ito ang inihayag ng isang sociology at political science professor.
Binigyang-diin ni Assistant Professor Louie Montemar ng Polytechnic University of the Philippines (PUP) na nawalan ng saysay ang mga huling panawagan ng mga kilalang taga-suporta ni Duterte sa gitna ng tumitinding tensyong pampolitika sa bansa.
“Hindi po ba napansin natin na ilang panawagan na ang ginawa ng mga lider o ng mga kinatawan ng mga Duterte supporters at nakita natin na hindi nila kaya magpatawag, mag-mobilize ng madaming tao at ma-sustain ito,” pahayag ni Montemar, na siya ring pinuno ng Advocacy Center ng PUP.
Ayon kay Montemar, bagaman hayagang hinimok ng ilang kaalyado ang mga taga-suporta na magtipon at ipagtanggol ang Pangalawang Pangulo, nanatiling napakaliit ng bilang ng mga dumadalo.
“Kahit si Harry Roque o si Mike Defensor nanawagan sila, walang nangyari,” dagdag niya.
Ikinumpara ni Montemar ang matamlay na pagtugon na ito sa mga dambuhalang kilos-protesta noong People Power Revolution at EDSA II, kung saan ang panawagan ng mga maimpluwensyang lider ay mabilis na nakahihila ng dambuhalang dagsa ng tao sa mga kalye.
Kinuwestiyon din ng propesor ang kredibilidad ng ilang politiko na sumusubok magdikta sa opinyon ng publiko hinggil sa isyu ng impeachment.
Partikular niyang binanggit ang bagong luklok na Senate President na si Alan Peter Cayetano.
Ang pag-upo ni Cayetano sa pwesto matapos ang isang balasahan sa liderato na tinawag ng mga kritiko bilang “Senate coup” ay iniuugnay sa tangka ng grupo ni Duterte na makakuha ng mas malaking impluwensya sa gaganaping paglilitis sa Senado.
Nahaharap din si Cayetano sa pambabatikos ng publiko sa pamamalakad nito sa usapin kay Sen. Ronald “Bato” dela Rosa.
Si Dela Rosa, na isang malapit na alyado ni Duterte at inaasahang tatayong hukom sa impeachment, ay nasangkot sa isang tensyonadong stand-off kaugnay ng tangkang pag-aresto sa kanya para sa imbestigasyon ng International Criminal Court (ICC) sa war on drugs ng nagdaang administrasyon.
“Sa tingin ko lalo na si Alan Peter Cayetano, bilang isang senador na wala na sa moral high ground, ‘ika nga ‘no, para manawagan sa kung ano ang tama at mali sa bansa, kaya sa tingin ko hindi nila kakayanin mag-mobilize ng madaming tao,” ani Montemar.
Matatandaang pinatalsik ng Kamara si Duterte dahil sa mga alegasyon ng maling paggamit ng P612.5 milyong confidential funds, tagagong kayamanan, panuhuol, at mga banta laban kina Pangulong Ferdinand R. Marcos Jr., First Lady Liza Araneta-Marcos, at dating Speaker Ferdinand Martin G. Romualdez. Mariing itinatwa naman ni Duterte ang mga akusasyong ito.
