DAGUPAN CITY– Pormal lan akapawil diad pwesto so mayor tan vice mayor na baley na Asingan, Pangasinan kasumpalan na sakey taon ya impakasuspindi.
Immuna ed saya, diad pinirmaan ya desisyon nen Ombudsman Conchita Carpio-Morales, dinusa da sikara di Mayor Heidee Chua tan Vice Mayor Carlos Lopez Jr na inpansumlang ed Code of Conduct and Ethical Standards for Public Officials and Employees.
Akapituyawan na Bombo Radyo Dagupan so duwaran abitlan opisyal tan pareho dan imbagan malike liket ira ta natuloy la so pangiter na serbisyo ed saray umbaley da.
Misalsalamat si Mayor Chua ed saray totoon anisia tan apansansian walad abay to anggano naarap iya ed kontrobersya.
Ipapasen dan aral tan leksyon nen Vice Mayor Lopez so naeksprensya dan sakey taon ya impakasuspindi.
Lapud saya, nagmaliw laran maalwar ed untombok.
No nanonotan, say suspensyon so nanlamot diad reklamo nen Asingan Councilor Evangelin Dorao sa nen Nobyembre 2016 no iner imbaga na konsehal ya sinmumlang ira di Chua tan Lopez diad memorandum circular na Department of Interior and Local Government Unit (DILG) ya mansesebel ed pangiyan na ngaran tan litrato na siopaman ya opisyal ng gobyerno diad saray billboard, karatula na programa tan pankayaryan na gobyerno.
