DAGUPAN CITY– Mangagawa natan na malet ya imbestigasyon so Bulacan PNP nilirad inpan-ambush ed sakey ya negosyanten Fil-Chinese tan driver tonya diad Brgy. Bulihan, Plaridel, Bulacan.
Tuloy so panaalotor da na impormasyon tapian nakabatan iray suspek ya amatey ed saray biktima ya kinabat ya sikara di Mariano Chua-Lu, 50 anyos tan driver ton si Yuri Baquira, walad suston edad tan parehon manaayam diad Brgy. New Manila, Quezon City.
Akabatan ya pasempet lara so biktima nen agawa so insedente.
Kasabi dad Sitio Mataas na Kahoy diad Brgy. Bulihan nen biglan pinmarungtal iray suspek tan pinapaltog so luluganan da ya sengegan ya apuruan iray biktima anggad binmangga so luluganan da diad sakey ya waiting shed ed asalitan lugar.
Tampol ya tinmakas iray suspek kayari na insidente. Arekober diad crime scene so 29 ya bala na 9mm kalibre paltog.
Anggulon walay koneksyon ed negosyo tan trabaho so nenengnengen na saray pupulis ya posiblen motibo na abitlan kremin.
