DAGUPAN CITY—Singa la nalgep diad pakapanyari si House speaker Pantaleon Alvarez kasumpalan ya manpasakbay ya agtonya itdan na pondo iray kongresista ya agga unsuporta ed say iskukurang ton federalism.
Diad ekslusibon impituyaw na bombo radyo Dagupan ed kinen Magdalo Partylist Representative Gary Alejano, impalapag tonya ya aliwan amin ya kongresista so naliliketan ed say palapag nen Alvarez.
Imporek nen Alejano ya say pakaanta nen Alvarez so personal ton kuwarta so pondo na gobyerno tan walay discretion to no siopa so pangitdan to.
Bangbalet agga anta nen Alvarez ya manbabayar na buwis iray constituent na saray kongresista ya kritikal ed administrasyon ya ekalan to na pondo.
Inyarum ni na kongresista ya agga nayarin ipasoot na House Speaker so labay to ya anggapoy partisipasyon na senado lautla diad isyu na pansalat na konstitusyon.
