DAGUPAN CITY– Tinalendegan na gobyerno ya diad Pilipinas gaween so unsublay ya peace talks diad baetan na gobyerno tan saray Komunistan grupo.
Diad ekslusibon impituyaw na Bombo Radyo Dagupan ed kinen National Security Adviser Hermogenes Esperon Jr. imbaga ton labay ya talaga nen president Rodrigo Duterte ya diad bansa tayo gaween so abitlan pantotongtong.
Inkuwanto ya anggapo so planon katongtongen na presidente iray rebelde diad arum ya bansa.
Bangbalet no diad bansa tayo gaween so peace talks so akatarya to yan ebatan so amin na pankaokolan da singa say naakan tan hotel ya napanayaman.
Inyarum ni nen Esperon, ya wala met so pigaran kondisyon na presidente piyan natuloy so pantotongtong.
Kabiangan ed saray kondisyon na presidente so pangipatonton na bilateral ceasefire o panunda ni na panpaputok diad biek tan biek ya panig; say malet ya pankontra ed coalition government o alyansa diad baetan na saray komunista; itunda na puwersa na NPA so panatake ed tropay gobyerno tan diad saray sibilyan; anggapoy gaween ya extortion o panketang, agga panderal ed saray pankayaryan na aray negosyante, instalasyon na gobyerno tan saray umbaley , itunda la so recruitment tan say kasampotan sebel lay manawit na saray armas piyan mantaktakot na totoo.
No nanonotan, kinansela na presidente so 5th round na peace talks kasumpalan ya igangan nen Communist Party of the Philippines founder Joma Sison so intensified attacks kontrad saray tropa na gobyerno diad kapegleyan na krisis diad Marawi City.
