DAGUPAN CITY– Pulitika so nanenengneng ya rason nen Binmaley Mayor Sammy Rosario ed pakakaawat to na death threat.
Diad say priveleged speech tonya, impalapag nen Mayor Rosario ya saya so linma lad Binmaley Police Station piyan manpablotter ta walay sakey ya misis ya inmasingger diad sikato tan nanreport ya wala so grupon civilly armed men ya manpaplanon mamatey ed sikato ya akalugan ed sakey ya pribadon luluganan tan sakey ya andeket ya motorsiklo ya anggapoy plate number.
Inkuwanto ya say nala tonyan impormasyon, sakey milyon pesos so ibabagan iyo-offer diad abitlan grupo piyan sikatoy pateyen.
Imbaga tonin nayarin walay kinalaman so kalaban tod pulitika makalanor ta anggapo met so kasibeg to diad negosyo.
Tuloy ni so imbestigasyon na intel-operatives na Binmaley PNP nilirad planon pamatey ed sikato.
