Inihayag ni Pangulong Ferdinand “Bongbong” Marcos Jr. na maaaring magdulot ng seryosong banta sa pambansang seguridad ang umano’y pagtanggap ng pondo mula sa China ng isang kumpanyang may kaugnayan kay VP Sara Duterte at sa kanyang asawa, kung mapatutunayang totoo ang mga alegasyon.
Sa pagdinig ng impeachment laban kay Duterte, kinumpirma umano ng Anti-Money Laundering Council (AMLC) na nakatanggap ang isang kumpanyang iniuugnay sa Bise Presidente at sa kanyang asawa ng kabuuang ₱319 milyon mula sa China at Hong Kong.
Ayon sa Pangulo, kung mapatutunayang totoo ang mga naturang transaksiyon, maituturing itong banta sa pinakamataas na antas ng seguridad ng Republika ng Pilipinas.
Gayunman, ipinahayag nito na umaasa siyang mapabubulaanan ang mga alegasyon.
Samantala, itinanggi ni Atty. Salvador Paolo Panelo, tagapagsalita ni Duterte, ang mga paratang na may kaugnayan sa China ang Bise Presidente dahil umano sa pagtanggap ng pondong mula sa mga Chinese.
Ayon kay Panelo, may donasyong nagmula sa pamahalaan ng China para sa Tapang at Malasakit Foundation, kung saan kabilang si Duterte sa mga trustee.
Dagdag niya, mahalagang malaman kung saan ginamit ang naturang pondo, gaya ng posibleng pagpapatayo ng mga silid-aralan o pagsuporta sa mga gawaing pangkawanggawa, at kung may mga dokumentong magpapatunay sa paggamit nito.
Sa ngayon, nananatiling mahalagang usapin ang beripikasyon sa pinagmulan, layunin, at paggamit ng mga naiulat na pondo.
