Pinalalakas ng Pangasinan State University (PSU) ang seguridad sa mga kampus nito sa pamamagitan ng pagkuha ng third-party security services upang matiyak ang kaligtasan ng mga estudyante, faculty members, empleyado at iba pang bahagi ng unibersidad.
Ayon kay PSU President Dr. Elbert M. Galas, may nakalaang pondo ang unibersidad para sa third-party security at janitorial services alinsunod sa mandato ng Department of Budget and Management (DBM) para sa mga state universities at iba pang government agencies.
Isinagawa sa pamamagitan ng bidding ang pagpili ng security agency na mamamahala sa seguridad ng unibersidad. Kailangang matugunan ng security provider ang mga itinakdang kwalipikasyon at magkaroon ng sapat na kapasidad, kagamitan, pasilidad at lisensya upang epektibong maipatupad ang mga security measures sa mga kampus ng PSU.
Bukod sa third-party security personnel, mayroon ding organic security force ang PSU na binubuo ng mga empleyado ng unibersidad. Gayunman, sinabi ni Galas na hindi sapat ang bilang ng sariling security personnel dahil walang ibinibigay na plantilla items para sa security positions sa mga state universities sa ilalim ng kasalukuyang sistema ng DBM.
Dahil dito, nagsisilbing dagdag na pwersa ang third-party security upang mapunan ang kakulangan sa bilang ng mga security personnel. Nakatuon ang mga ito sa pagbabantay sa mga pasilidad, pagpapanatili ng kaayusan at pagtugon sa mga pangangailangan sa seguridad sa loob ng mga kampus.
Mahalaga rin ang pagkakaroon ng mga security personnel na may sapat na training at karanasan, gayundin ng mga kinakailangang kagamitan at pasilidad upang mabilis na matugunan ang anumang insidente na maaaring makaapekto sa kaligtasan ng komunidad ng PSU.
Sa pamamagitan ng pagsasama ng organic at third-party security forces, layunin ng PSU na magkaroon ng mas malawak at organisadong sistema ng seguridad na tutugon sa pangangailangan ng unibersidad at makapagbibigay ng mas ligtas na learning environment para sa mga estudyante at buong pamayanang pang-akademiko.
