DAGUPAN CITY-Mas eneletan na National Food Authority o NFA Western Pangasinan so monitoring ed saray unpipila tan mansasaliw na NFA rice ya ilalako na saray Accredited Retail Outlet.
Saya et pian nasiguron anggapo ray indibidwal ya man-anamot na unulit ya unpila.
Diad ekslusibong impituyaw na Bombo Radyo Dagupan ed kinen Chona Maramba, OIC Assistant Manager na NFA Western Pangasinan inkuanton regular so gagaween dan monitoring ed saray manlalako na belas tan untan met ed saray mansasaliw.
Diad katuwaan tonya, aalaan da na video iray indibiduwal ya uunla tan unpipila ed saray Accredited Retail Outlet na NFA piyan nasiguron anggapoy unulit ya unpila.
Insebel metla so panusar o igangan iray ogogaw ya unmpila piyan makasaliw na belas.
Kaleganan tonya, impalapag nen Maramba ya Lukas so opisina da parad saray reklamo.
Tinangguyor sa met so publiko ya agga natatakot ya mandalem diad opisina da na antokaman ya iregularidad ya naimatunan ed panaliw na abitlan belas.
