DAGUPAN CITY– Akatarya lan manggalaw diad Region 1 Athletic Association Meet o R1AA so unsulok unkulang ya 500 ya atleta ya manlapu diad siyudad na Dagupan ya gaween diad ciudad na Alaminos.
Diad impituyaw na Bombo Radyo Dagupan ed kinen Maam Finella Sim, say Sports Commissioner na Dagupan City Sports Commission impalapag tonya ya getma na saray atletan manalo tan makala na medalya kanyan puspusan tan todo ra ensayo.
Inkuwanton, diad ensayo labat la anengneng la sa kamaungan na saray walad kalangweran ya atleta kanyan posibleng makala eraya na medalya.
Kaleganan tonya, akisalamat si Sim ed lokal ya gobyerno ya agga unsasawan untutulong diad panamegley na pangiiter na suporta diad saray atleta.
Kinompirma to met ya akaawat tan naitdan iray gumagalaw na cash incentives tan cash allowance ya nanlapu diad city government.
Onong ed si Sim, anggaman saray sports equipment ya uusaren so inter met na ciudad.
Kinerew to met diad saray totoo partikular aray taga Dagupan ya suportaan iray atletan migalaw diad R1AA ya nagawa diad ciudad na Alaminos.
