DAGUPAN CITY– Aga ilaluan nen Arnold Geronimo ya tubon Manaoag, Pangasinan ya nakaiba iya diad Top 10 ed saray pinmasan Medical Technologist ed kakasumpal na Medical Technologist Licensure Examination.
Onong ed si Mr. Geronimo, duga la ed sikato so makapasa diadeksamin bangbalet aliketan iya nen walad Top 5 ed saray masolok ya 3,000 nan-exam.
Inpalima to lad say Diyos so magmaliw ya resulta na eksamin bangbalet binansagan to na malet ya panaral kanyan malike-liket iya nen anengneng toy ngaran to diad listaan na saray akapasa.
Kapara na arum ya estudyante, akaranas met iya na irap ed sayan kurso to bangbalet agya nagmaliw ya hadlang ed say pangarap to.
Nen Lunes , initdan iya na parangal na Sangguniang Panlalawigan ya manbibirir ed sikatong akabiang diad Top 10 ed abitlan eksamin.
