DAGUPAN CITY– Malet ya imburi na sakey ya arsobispo manlalapud probinsya na Pampanga ya personal tonyan facebook account so mankekerew na kuwarta parad donasyon ya usaren ed saray proyekto na simbaan.
Nilinew nen Archbishop Emeritus Paciano Aniceto kaplesan ya walay official mission diad bansan Amerika ya anggapoy antokaman ya facebook account tonya.
Say katuwaan to, anggapo anggano laptop o celfone to ya nayarin nausar diad pangawa na social media account.
Akabatan ya taloran account na arsobispo so ibabagan ginawa ya inusaran na ngaran ya singa say “Abp Paciano Aniceto,” “Paciano Aniceto” tan “Archbishop Paciano Aniceto.”
Say ibabagan kekerewen ya donasyon so para ed charity crusade of the Virgen de los Remedios diad abroad tan para ed renovation na Mother of Good Counsel Seminary.
Sakey ed saray naawat ya donasyon so impaway na sakey ya branch na BDO diad Makati City.
Say ginawan facebook account so awalaan na litratro na arsobispo legan ya mangagaway trabaho to kanyan anisya iray biktima tonya.
