Hindi basura kundi pamilya ang itinuring na itinapon sa isang bakanteng lote sa San Jose, Bulacan matapos matagpuan ang 29 na bangkay ng alagang hayop na binubuo ng 26 na aso at 3 pusa na dapat sana ay na-cremate sa ilalim ng isang pet crematorium.
Sa panayam ng Bombo Radyo Dagupan kay Animal Kingdom Foundation President Atty. Heidi Marquez-Caguioa ngayong Nobyembre 3, 2026, sinabi nitong labis silang nabigla at nagalit sa insidente dahil batid ng grupo ang malalim na ugnayan ng mga pet owner at ng kanilang alaga na itinuturing nang bahagi ng pamilya.
Ayon sa AKF, pinangakuan ang mga may-ari ng maayos na after life service kasama ang cremation at pagbabalik ng abo, ngunit nadiskubreng itinapon lang pala ang mga labi sa ibang lugar kaya malinaw na may paglabag sa obligasyon at panloloko sa mga kliyenteng nagbayad para sa marangal na pamamaalam ng kanilang alaga.
Giit ng pundasyon, hindi ito simpleng isyu ng maling pagtatapon ng basura kundi usapin ng paggalang sa buhay at dignidad ng hayop dahil kahit pumanaw na ay nararapat pa rin itong tratuhin nang may respeto, habang tinitingnan na rin ng NBI ang posibleng pananagutan ng may-ari sa estafa, paglabag sa solid waste management law, sanitation code, consumer act at maging sa business permit.
Kaugnay nito, may mga pet owner na lumapit na sa AKF para humingi ng legal na tulong kung saan may nakatanggap na ng refund habang ang iba ay tuloy sa pagsasampa ng kaso, kasabay ng panawagan ng grupo sa NBI at PNP na magsagawa ng masusing imbestigasyon upang hindi na maulit ang ganitong insidente sa iba pang pet crematorium sa bansa.
