Dagupan City– Ligtas tan wala lad maong ya kipapasen so limaran managsigay diad Infanta, Pangasinan kasumpalan ya nalgep so niluganan dan bangka.
Diad impituyaw na Bombo Radyo Dagupan ed kinen kapitan Charlito Maniago, ng barangay Cato, Infanta , nabutan na maksil ya dagem iray abitlan managsigay diad pegley na dayat. Diad kasil na daluyon so apigar so bangka da tan linmereg.
Piyan nailigtas so sarili da, duwara ed saranya so tampol ya linmugan ed mas melag ya bangka legan ya atilak so talora.
Binaybay na sa ray duwara so maawang ya dayat anggad akasabi irad parte na Dasul. Diman da imbaga ed saray makankanepegan da so agawa ed sikara.
Tampol met ya ginmalaw tan nangawa na operasyon so Philippine Coastguard piyan anapen iray atilak ya managsigay diad dayat.
Nalmo met ira na saray crew ng PCG tan sikaray akasempet metla ed saray pamilya da.
