DAGUPAN CITY- Masyadoy ermen na pamilya na sakey ya intelligence chief na Norzagaray PNP kasumpalan iyan apatey na sakey ya sangkot ed illegal ya droga diad probinsya na Bulacan.
Aga inilaluan na pamilya nen P03 Ronaldo Legaspi ya nagawad sikato man legan ya gagaween tonya so trabaho to.
Onong ed nalan impormasyon na Bomboradyo Dagupan, ginawa so buybust operation na Norzagaray PNP kontrad suspek ya si Rolando Padura ya sangkol ed panlalako na illegal ya droga diad lugar tan arum nin klase na kremin.
Bangbalet nanpaputok so suspek tan naknay taloran bala na paltog si Legaspi ya sengegan na tampolan ton impatey.
Lapud saya, nanpaputok met iray otoridad ya sengegan na impatey na suspek.
Akabatan ya 21 taon la ed serbisyo si Legaspi tan naulila toy asawa tan taloran anak to.
Akumpiska met ed suspek so 9mm pistol, aray magazine tan bala, kuwarta tan 6 sachet na iinapen ya shabu.
