DAGUPAN CITY– Aliwan big deal diad kinen datin Lingayen Dagupan Archbishop Oscar Cruz so impangipayurong na balon Presidente na Catholic Bishops Conference of the Philippines o CBCP diad inkatoo nen Davao City Archbishop Romulo Valles.
Diad impituyaw na Bombo Radyo Dagupan ed kinen Archbishop Cruz, standard operating procedure na CBCP ya no siopay akayurong ya bise-presidente so sikatoy unsalat ya magmaliw ya presidente diad oras ya nasumpal lay termino na presidente.
Pinayuan nen Cruz si Archbishop Valles ya agto lilingwanan ya man-pokus diad morals tan ethics tan aliwan diad pulitika.
No nanonotan, apilin unsublay ya presidente na CBCP si Archbishop Valles na Davao City kasalat nen outgoing CBCP President Archbishop Socrates Villegas.
Legan ya Vice President balet si Caloocan Bishop Pablo David.
