DAGUPAN CITY– Lukas so Department of Labor and Employment (DOLE) ed reklamo na saray obrero ed say employer da partikular saray Overseas Filipino Workers ya mantratrabaho diad arum ya bansa.
Saya so impasiguro nen Labor Secretary Silvestre Bello III diad impituyaw ed sikato na Bombo Radyo Dagupan.
Onong ed kinen Bello, antokaman ya ey-ey, reklamo o concern na saray Pinoy worker so nayari lan isingger diad opisina da piyan nagawaan na paraan o nasolusyunan.
Kaleganan tonya, impalapag nen Bello ya saray ey ey na saray obrero ed saray employer da ya agga mangiiter na suston pasweldo, manaabuso tan mansasakit na pisikal so uunaen dan aaksyunan lautla biek tan biek so umpapaway ya balita ya dakel ya Pinoy worker so makakaranas na panmamaltrato ed sikara na say amo da.
Sakey ya halimbawa la dya so kaso nen Joanna Demafelis ya nalmon bangkay diad loob na sakey ya freezer ed abandonadon apartment diad Kuwait ya papanisyaan ya minaltrato na saray dayuan ya amo to.
