DAGUPAN CITY—Naalarma so Department of Health o DOH Region I ed say inleksab na bilang na saray manpapabakuna na anak da kasumpalan na kontrobersyal ya dengue vaccine ya dengvaxia.
Diad eksklusibon impituyaw na Bombo Radyo Dagupan diad kinen DOH Region I Senior Health Progam Officer John Lee Dacusan, inkuwanton base ed say istatistika, wala ed limaran pursyento so nileksaban na saray mapapabakuna kontrad sakit ya baris, bulutong tan polio.
Onong ed si Dacusan, anggano daiset laban so nileksaban na bilang na saray abakunaan diad rehiyon 1, makapa-paga nin sansia so inleksab to ta maples so itatayak na sarayan sakit tan saray agga abakunaan so atagey so posibilidad ya umpatey lapud sakit singa say bulutong, baris tan polio ya nayarin nabaat diad tulong na say bakuna.
Kaleganan tonya, anawag imano iya ed saray atateng ya pabakunaan so anak da piyan nailigtas irad sakit tan naprotektaan ira ta say tambal ya uusaren so abayag lan subok tan aprubado na World Health Organization (WHO).
