Mariing pinabulaanan ni House Justice Committee Chairperson at Batangas 2nd District Representative Gerville Jinky Luistro ang alegasyon na may mga mambabatas na inalok ng pondo o suhol kapalit ng kanilang boto sa impeachment laban kay Vice President Sara Duterte.
Ayon kay Luistro, wala siyang natanggap na anumang pagtatangka mula sa liderato ng Kamara upang impluwensyahan ang paraan ng pagboto sa komite.
Ang isyu ng suhulan ay unang binanggit ni Navotas Rep. Toby Tiangco, ngunit agad itong itinanggi ng iba pang miyembro ng komite gaya ni Manila Rep. Joel Chua.
Giit ni Luistro, bagama’t likas na political process ang impeachment, nakabatay pa rin ito sa ebidensya at pananagutan sa publiko.
Sa kasalukuyan, nagpapatuloy ang deliberasyon sa Kamara hinggil sa mga reklamong impeachment laban kay Duterte, na nakatuon sa umano’y misuse ng confidential funds noong siya ay kalihim ng DepEd.
Ang usapin ay nagdudulot ng matinding atensyon sa publiko, lalo na’t nananatiling sensitibo ang political climate sa bansa.
Sa kabila ng mga alegasyon, tiniyak ni Luistro na mananatiling patas at transparent ang proseso ng komite.
