DAGUPAN CITY– Aalagaren la na Mexico Pampanga PNP so resulta na ginawan inpan-iksamin ed bangkay na 17 anyos ya marikit ya kinotkot tan inabuso na sakey ya lakin awalaan na sakit ya necrophilia diad Patirik Tirik Public Cemetery ed Barangay Sto. Cristo diad baley na Mexico, Pampanga.
Diad ekslusibon impituyaw na Bombo Radyo Dagupan ed kinen PSupt Welfrido Paulo, hepe na Mexico Pampanga PNP, kinotkot tan iniksamin so bangkay na abitlan marikit nen September 7.
Ginawa so abitlan kurang ta pian naantaan so toon walaan na sakit ya necrophilia ya nanabuso ed bangkay tonya.
Inamin nen Paulo ya angga nid natan naiirapan iran ibiang ed kremin so ipapasen ya person of interest lapud anggapoy testigo.
Lapud saya, say resulta na ginawan inpan-iksamin labat ira makala na ibidinsiya piyan naantaan no siopa so walad benegan na sayan kremin.
Nanonotan, anggapo lay kawes na biktima nen saya so nalmo pigaran metro so kaarawi to diad angiponponan diad sikato no iner aderal pati say sakob na pantyon tonya.
Say Necrophilia ya tatawegen met ya thanatophilia o necrolagnia, so sekswal ya atraksyon ed sakey ya bangkay.
