DAGUPAN CITY– Unkekerew na dasal iray Pilipino ya manaayam diad Hawaii lapud iilaluan ya isabi na Hurricane Lane.
Diad eksklusibon impituyaw na Bombo Radyo Dagupan ed kinen Israel Jim Pacis Savellano sakey ya Pinoy ya abayag lan manaayam diad Ewa Beach, Hawaii anggad weekend ni so iilluan ya posiblen epekto na bagyo.
Inkuwanton manisiya iran diad panamegley na dasal so unkalna so kasil na Hurricane Lane tan agga mangiter na baleg ya desyang ed saray residente.
Immuna ed saya, tinangguyor na Philippine Consulate General so Filipino community ya mantarya na 14 ya agew ya emergency supply kabangan so danum, saray agga nabangles na naakan ya agla kaokolan ya iluto, radyo, flashlights, reserban baterya, sumpit parada pangitawag na tulong, saray personal ya gamit, tambal tan saray pankaokolan na ogogaw tan saray alagan ayep.
Pinayuan met iray Pinoy diman ya ununor ed amin ya warnings tan panonot na Hawaii State tan Federal government authorities nilira ed abitlan bagyo.
