Dagupan City – Pinaiigting ngayon ng Pamahalaang Bayan ng Bautista ang mga hakbangin nito laban sa posibleng banta ng Super El Niño matapos opisyal na buuin at i-activate ng Municipal Disaster Risk Reduction and Management Council (MDRRMC) ang Municipal Task Force El Niño.
Layunin ng binuong task force na palakasin ang koordinasyon ng iba’t ibang tanggapan at sektor upang mabantayan ang mga posibleng panganib at mapanatili ang tuluy-tuloy na serbisyo sa buong bayan.
Upang maging komprehensibo ang pagtugon sa krisis, hinati ang task force sa limang pangunahing sektor na tututok sa mga pinakamahahalagang pangangailangan ng mamamayan.
Pangungunahan ng Municipal Agriculture Office (MAO) ang Sektor sa Food Security upang suportahan ang mga magsasaka at tiyakin ang suplay ng pagkain, habang ang Municipal Environment and Natural Resources Office (MENRO) naman ang mamamahala sa Water Security para sa konserbasyon at pagmamanman ng suplay ng tubig sa lokalidad.
Samantala, nakatutok naman ang Municipal Health Office (MHO) sa Health Security upang pigilan ang pagdami ng mga sakit na dulot ng matinding init at matiyak ang tuluy-tuloy na serbisyong pangkalusugan .
Sa kabilang banda, ang Municipal Engineering Office (MEO) ang may hawak sa Energy Security upang pangalagaan ang operasyon ng mga kritikal na pasilidad at ihanda ang mga backup power sakaling magkaroon ng krisis sa kuryente.
Nakataya naman sa Municipal Disaster Risk Reduction and Management Office (MDRRMO) ang Sektor ng Seguridad sa Publiko na siyang mamamahala sa early warning systems, pagpapatakbo ng Emergency Operations Center (EOC), at pangkalahatang kaligtasan ng mga komunidad.
Binigyang-diin ng MDRRMC na ang maagang pagpaplano at maagap na pagkilos ang pinakamabisang depensa upang maprotektahan ang kabuhayan, likas na yaman, at kalusugan ng bawat mamamayan bago pa man ganap na maramdaman ang matinding tagtuyot.
Bukod sa paghahanda sa El Niño, tinalakay rin sa naturang pulong ang mga pangkalahatang planong pangkaligtasan tulad ng paghahanda para sa Oplan Undas 2026, ang pag-activate ng Municipal Task Force African Swine Fever (ASF), at ang pagbuo ng CY 2027 Local Disaster Risk Reduction and Management Investment Plan (LDRRMIP).
Sa pamamagitan ng mga hakbanging ito, patuloy na isinusulong ng pamahalaang bayan ang sama-samang paghahanda upang matiyak ang seguridad at kapakanan ng buong bayan ng Bautista.
