Mariing tinutulan ng Samahang Industriya ng Agrikultura (SINAG) ang pagpapatupad ng Executive Order (EO) 116 series of 2026, na naglalayong itaas ang volume ng imported na baboy sa bansa at babaan ang taripa nito. Sa isang panayam, binigyang-diin ni Jayson Cainglet, Executive Director ng SINAG, na ang nasabing kautusan ay hindi na angkop sa kasalukuyang sitwasyon ng industriya.
Ayon kay Cainglet, ang EO 116 ay ibinatay sa mga rekomendasyon ng Department of Agriculture (DA) at NEDA noong nakaraang taon (2025) dahil sa umano’y kakulangan ng supply at mataas na presyo. Gayunpaman, iginiit niya na walang shortage ng baboy sa kasalukuyan at hindi ito itinuturing na inflation driver ng Philippine Statistics Authority (PSA).
Ikinagulat din ng sektor na ipinatupad ito ngayong Hunyo gayong ang sitwasyon noong nakaraang taon ay malayo sa nararanasan ngayon ng mga magbababoy. Sa katunayan, bumagsak ang farmgate price sa ₱160–₱170 kada kilo, na mas mababa sa production cost na nasa ₱200.
Inihambing ni Cainglet ang taripa sa isang “bakod” na dapat ay nagpoprotekta sa mga lokal na magsasaka. Sa ilalim ng EO 116, tila ang gobyerno pa umano ang tumitibag sa nasabing bakod upang hayaang bahain ng murang imported na karne ang merkado, na direktang papatay sa kabuhayan ng mga backyard raisers.
Dahil dito, seryosong pinag-aaralan ng SINAG ang paghahain ng petisyon sa Supreme Court upang ipatigil ang pagpapatupad ng EO, na tinawag nilang isang “ilegal” na hakbang dahil sa kawalan ng tamang konsultasyon at batayan.
Hindi lamang baboy ang apektado ng sobrang pag-iimport; nakararanas din ng oversupply at bagsak-presyo ang sektor ng manok at itlog. Bukod sa banta ng importasyon, nahaharap din ang mga magsasaka sa pinsalang dulot ng El Niño, na inaasahang magpapababa sa produksyon ng palay, mais, at gulay sa huling bahagi ng taon. Inireklamo rin ng grupo ang mabagal at huling pagdating ng mga subsidy mula sa gobyerno, tulad ng fertilizer aid, na hindi na mapapakinabangan ng mga magsasakang nakapagtanim na.
