Nagpahayag ng pangamba si Ariel Lim, presidente ng National Public Transport Coalition, na maraming e-bike users ang tiyak na magugulat at aalma sa pagpapatupad ng pagbabawal sa e-bikes sa mga national highway simula Disyembre 1.
Ayon kay Lim, siguradong may mga magrereklamo dahil hindi lahat ng mamamayan ay nakaririnig ng anunsyo sa media.
Kaya nanawagan siya sa pamahalaan na palakasin na ngayon pa lang ang information campaign.
Iginiit ni Lim na dapat ay noong nakaraang buwan pa lamang ay tuloy-tuloy nang nagpapaalala ang mga barangay sa kani-kanilang lugar — hindi lamang sa Metro Manila, kundi sa buong bansa.
Aniya dapat pantay-pantay ang abiso dahil hindi lahat nanonood ng balita, kaya trabaho ng barangay na iparating agad ang impormasyon.
Dagdag pa niya, mahalagang maipaalam nang maaga sa mga e-bike owners upang pagdating ng Disyembre 1 ay hindi sila mabibigla o mapapatawan agad ng parusa.
Binanggit din ni Lim na kasabay ng pagtaas ng bilang ng e-bike users sa bansa ay ang pagtaas din ng mga naitalang aksidente.
Dahil dito, aniya, kinakailangan na ng kongkretong aksyon mula sa gobyerno upang maiwasan ang mas maraming sakuna.
Ibinunyag ng koalisyon na nagkakaroon na rin ng suliranin ang mga tradisyunal na tricycle operators dahil pumapasada na rin umano ang ilang e-bike sa kanilang mga ruta.
Saad nito, matagal na dapat itong inaksyunan ng pamahalaan upang hindi nagdudulot ng kompetisyon na nakapipinsala sa kabuhayan ng mga tricycle driver.
