DAGUPAN CITY – Nansumpal ed saksakan so simplen tongtongan na sanbayaw diad Barangay Navaluan, Mangaldan, Pangasinan.
Onong ed kinen Pltcol. Perlito Tuayon, COP na Mangaldan Police Station, nanlapu nid Parañaque so biktima piyan bisitaen so pamilya na agi to diad abitlan baley.
Akabatan ya awalaan ni na melag ya panleleketan antes ya agawa so insidente.
Kaleganan ya sikara so mantotongtong nilirad presyo na saray kayaryan da singa say baka, diman lara nandiskusyon anggad nansumpal ed balingaan.
Inkuwan na suspek, ya depensa labat so ginawa to kayarin pinekpek ya na bayaw to na yurongan diad ulo tonya.
Akagamor na sakey ya saksak so biktima tan tampol met ya nanpatambal legan ya say suspek so akagamor met na mild head injury diad ulo to makasengeg ed inpamekpek dad sikato.
Emben la na pulisya so suspek tan akagetar ya isegepan na kason Frustrated Homicide.
