DAGUPAN CITY — Dead on the spot ang isang instructor pilot habang sugatan ang estudyante nito matapos na bumagsak ang sinasakyan nilang two-seater training fixed wing plane sa Sitio Paradise, Brgy. Telbang sa lungsod ng Alaminos.
Kinilala ang nasawing biktima na si Captain Daryl Uy, habang ang sugatang biktima ay kinilalang si Caran France Kaura, 21 anyos, na residente ng Brgy Pagkakaisa, San Narciso, Quezon Province.
Base sa inisyal na imbestigasyon ng kapulisan, bandang 9:20 kaninang umaga nang bumagsak ang sinasakyan nilang training plane na may body number na RP-C8202 at may markang “Fly Fast”, sa isang fish pond sa kahabaan ng Brgy Telbang.
Dahil sa lakas ng impact ng pagkakabagsak, namatay on the spot ang pilot instructor habang ang student pilot na si Kaura ay nagtamo ng physical injury sa iba’t ibang bahagi ng kanyang katawan at agad na dinala sa Western Pangasinan District Hospital ng Alaminos City Rescue Unit para sa medical treament.
Nagpapatuloy naman ang isinasagawang imbestigasyon nga amga otoridad kaugnay sa nangyaring insidente. (With reports from Bombo Marven Majam)
