DAGUPAN CITY – Inatey so apatiran totoo legan ya maswerten akaligtas so sakey ya ogaw ya bii diad bangaan na sakey ya SUV tan kotse diad National Highway, Barangay San Rafael, Cabangan Zambales.
Onong ed inisyal ya impormasyon ya nala na Bombo Radyo Dagupan diad Cabangan Police Station, lapud grabin head on collision, dead on the spot so driver na kotse ya kinabat ya si Danilo Ladrigan, ya residente na Brgy. Lucero San Marcelino, Zambales untan met say lugan ton duwaran bibiin agni akabatan so kangaranan da legan ya sakey ni so peles nin oobserbaan diad patambalan.
Ipapasen ya sakey ya milagro so impakasalba na ogaw ya bii ya manedad na duwara anggad taloy taon ya akalugan met ed abitlan luluganan.
Kaleganan tonya, dead on the spot so sakey ya biktima ya kinabat ya si Maria Ofelia Ebue ya akalugan ed SUV ya imamaneho nen Gilbert Elorde, residente na Binabalian, Candelaria, Zambales.
Sugatan met so sakey ya bii ya akalugan met ed SUV.
Ibabagan human error so makasengeg na aksidente ya nanresulta ed impakayupi na saray luluganan ya singa pinitpit ya lata.
Diad kaplesan, patuloy so imbestigasyon na saray otoridad ed agawan aksidente.
