DAGUPAN CITY – Malet ya tututukan natan na PNP Zaragosa so pakaerel ed saray suspek ya amatey ed kinen Father Richmond Nilo legan ya manpreprepara na misa diad sakey ya chapel diad baley na Zaragosa, Nueva Ecija.
Saya so imporek nen PCI Mohammed Abdul Halem, Chief of Police na Zaragosa Police Station, diad eksklusibon impituyaw na Bombo Radyo Dagupan nilirad agawan insidente.
Anggaman anggapo so malinew ya motibo , target dan naerel iray suspek tan laotla walay nala dan kopya manlapud Closed Circuit Television (CCTV) cameras asingger diad akagawaan na krimen.
Anawag imano met so hepe ed saray akanengneng o makankabat ed saray suspek ya mitolongan ed sikara pian napapeles so panresolba na krimen.
Agmet kinumpirma nen Halem no wala lay anta dan motibo ed krimen.
Sa imbaga labat na liderato na PNP Zaragosa so impakaawat da na direktiba manlapud higher office piyan tutukan tan tampol ya resolbaen so kaso.
Diad natan, manitibokel la ra na task force anggano ag ira initdan na timeline piyan naresolba so krimen.
Kaleganan tonya, pakakalmaen nen Halem so publiko ta gagaween day amin ya polaing piyan naresolba so krimen tan mansansian mareen so lugar da.
