DAGUPAN CITY– Inatey kasumpalan ya nalener so sakey ya onse anyos ya ogaw ya laki diad Lingayen Gulf ed Brgy. San Isidro Norte, Binmaley, Pangasinan.
Kinabat so biktima ya si Mike Lawrence De Vera, grade 4 student tan residente na Brgy. Caloocan Sur diad abitlan baley.
Diad say inisyal ya imbistigasyon, walad alarem ya parte na dayat so biktima kaiba so atsi tonyan si Maria Karen Coney De Vera nen bigla labat ya guyuren na maksil ya daluyon so biktima ya sengegan na impakalener to.
Tampol ya linma so agi to diad cottage ya nirentaan da piyan unkerew na tulong ed saray kakanayon da balet agdala iya anengneng.
Kinmerew met ira na tulong diad Binmaley Police Station, Municipal tan Provincial Disaster Risk Reduction and Management Council tan insan diman da met la anengneng so bangkay na biktima.
Inawit diad ospital so biktima bangbalet indeklaran Dead on arrival na saray doktor.
