DAGUPAN CITY– Angapoy problema ed kinen National Security Adviser Hermogenes Esperon Jr. iray indibidwal ya manlabay ya manpulis o mansundalo ya walaan na tattoo diad laman da.
Diad ekslusibon impituyaw na Bombo Radyo Dagupan ed kinen Esperon, imbaga toyan agga maoges so ikiwala na tattoo ed saray pulis bangbalet nakaokolan ya akaimprinta iya ed parte na laman ya nasasakuban o agga tampol ya naimano na anggano siopa.
No nanonotan, impalapag nen House Appropriations Committee Chairman Davao City Representative Karlo Nograles ya nepeg ya ikalen na Armed Forces of the Philippines tan Philippine National Police so regulasyon dan agga nayarin makaloob diad opisina da so walaan na tattoo diad laman.
Inkuwanto ya sayan polisiya so ‘archaic’ o daan la kanyan nepeg ya ekalen la.
