DAGUPAN CITY– Inatey so taloran too kabiangan so 5 anyos ya ogaw legan ya sugatan so taloran arum nira kasumpalan na impaaksidente da diad parte na New de venecia highway Lucao Dagupan City.
Onong ed impormasyon, undadalan so sakey ya tricycle ya imamaneho nen Michael Reyes tan van ya imamaneho nen Romeo Bugawan 53 anyos diad New Devenecia Highway nen man overtake so van ed sakey ya luluganan ya nanresulta na impakabangga ed kaabetan ton tricycle.
Lapud saya, tampol ya binawian na bilay so driver na tricycle ya si Reyes kaleganan ya indeklaran dead on arrival so lugan ton sikara di Karen Viliran 28 anyos tan anak ton si Wendy 5 anyos.
Sugatan met so sanaaman sikara di Wendel Reyes tan anak ton sikara di Delisa 7 anyos tan Hanita 1 anyos.
Maswerten agga asugatan so driver na van ya si Bugawan.
Lapud kasil na impak na banggaan, singa ayupin lata so tricycle.
Manpapatuloy so imbestigasyon na kapulisan diad abitlan insedente.
