Nagbabala ang Manibela, sa pangunguna ng presidente nitong si Mar Valbuena, na posibleng muling tumaas ang presyo ng produktong petrolyo sa susunod na linggo isang hakbang na itinuturing na isa na namang mabigat na dagok sa mga tsuper at operator ng pampublikong transportasyon.
Ayon kay Valbuena, tinatayang P2 hanggang P3 kada litro ang posibleng dagdag-presyo.
Giit niya, malaking diperensiya ang agwat ng pagtaas kumpara sa pagbaba, dahil kapag may rollback ay sentimo lamang kadalasan ang ibinababa.
Kung susumahin, sinabi ng Manibela na halos P6,000 kada taon ang nawawala sa kita ng bawat driver dahil sa sunod-sunod na oil price hikes.
Dahil dito, marami sa mga tsuper ang napipilitang magdagdag ng oras sa pamamasada upang may maiuwi lamang na sapat na kita.
Nilinaw ni Valbuena na wala pang inaasahang taas-pasahe ngayong buwan dahil patuloy pa itong pinag-aaralan ng mga kinauukulan.
Sa ngayon, aniya, tila walang konkretong solusyon ang pamahalaan sa pagtaas ng presyo ng langis, kaya umaasa ang grupo na maibaba ang presyo o kaya’y mabigyan sila ng fuel vouchers o tawid-pasada assistance.
Gayunman, binigyang-diin niya na hindi lahat ng tsuper ay nakatatanggap ng fuel subsidy, kaya marami ang patuloy na nahihirapan sa pag-angat ng kanilang kabuhayan.
Dagdag pa nito, maraming operator ang nalulugi at nalulubog sa utang dahil sa gastusin sa modernisasyon.
Kaya nananawagan ang Manibela na muling pag-aralan ang individual modernization upang hindi tuluyang maapektuhan ang kabuhayan ng maliliit na operator.
Sa kabila ng patuloy na pagtaas ng presyo ng produktong petrolyo, umaasa ang Manibela na bago matapos ang taon ay magkaroon ng malaking bawas sa presyo ng langis upang makabawi ang mga tsuper.
