DAGUPAN CITY– Inatey so sakey ya clerk na Eastern Pangasinan District Hospital kasumpalan ya pinaltog na saray agga kabat ya suspek diad baley na Tayug, Pangasinan.
Kinabat so biktima ya si Marieta Reyes, 56 anyos, clerk diad Eastern Pangasinan District Hospital tan residente na barangay Trenchera, diad abitlan baley.
Onong ed kinen Police chief inspector Jose Abaya II, na Tayug PNP unloob lad trabaho to so biktima bandad 7:47 na kabuasan lugan ed say motorsiklo to nen paltogen na duwaran lalaki ya akasulong na helme.
Papanisiaan ya tinalaranan iya ed say impaway tod abong tan tinombok na saray suspek ya akalugan na motorsiklo.
Nibatik ni diad ospital so biktima bangbalet indeklaran dead on arrival. Akarekober so pupulis na apatiran basyo tan sakey ya slug na paltog ya inusar ed impamaltog ed say biktima.
Impalapag nen Abaya ya pinlano so impanpatey ed biktima ta inaral na saray suspek so oras na ipapaway to diad abong tan oras na kakaloob tonya.
Onong met ed say initial ya imbestigasyon, anggapo so antokaman ya police record so biktima tan anggapo so anta na kapamilya to ya pasakbay ed bilay to o walay kakolkol tonya.
Kaleganan tonya, patuloy ni so gagaween ya imbestigasyon na saray otoridad ed abitlan impamaltog.
