PESO, walay opresin trabaho diad Japan parad saray OFW ya naapektuan na repatriation ed Kuwait

DAGUPAN CITY- Walay marakep ya balita so Provincial Employment Services Office (PESO) Pangasinan, parad saray Overseas Filipino Workers (OFW’s) ya nanlapud probinsya ya naapektuan na mandatory repatriation ed bansan Kuwait.

Onong ed kinen PESO Pangasinan head Alex Ferrer, parad saray agga talagan napigilan ya manlabay ya mantrabaho diad biek taew, walay marakep ya trabaho diad bansan Japan, piyan magmaliw ya domestic helper o DH.

Inkuwanto na mangipapawit met ira na saray DH diad Singapore o Hong kong diad panamegley na recruitment agency bangbalet aliwan diad Middle East.

Marakep inkuwanto so manaplay diad Japan ta anggapo so placement fee ya nakaokolan tan agga nakaokolan ya manayam so DH diad abong na say amo to.