DAGUPAN CITY– Emosyonal ya kinmerew na tulong diad Bombo Radyo Dagupan so kapamilya na sakey ya Pinay OFW ya ibabagan akakulong diad Riyadh, Saudi Arabia.
Diad ekslusibon impituyaw na Bombo Radyo Dagupan ed kinen Maribeth Villaflor, agi na OFW ya si Marites Suyat, 29 anyos, tan tubon Binalonan Pangasinan, labay dan naantaan so situwasyon na agi da.
Agdala iya natawagan anggad akabatan ya inkulong da ed abitlan bansa.
Napapagaan so pamilya to ed say situwasyon na abitlan Pinay.
Say kerew da so makasempet la so agi da anggano anggapo ladtan so naisempet ton kuwarta.
Onong nid si Villaflor, akabatan dan naplag so agi da kaibay alaga to diad takayan. Agto met ginagala ta dakel so aalagaen to.
Bangbalet tampol iyan impaaresto ed saray pupulis na say amo to.
Sampot ya akatongtong day agi to nen September 16 tan agmet la aka online diad social networking site ya facebook.
Diad panakar na agew, akabatan da ed say katulong na agi na amo to so agawa ed say abitlan OFW.
