DAGUPAN CITY – Imburi nen National Security Adviser Hermogenes Esperon Jr. ya 39 ni bilang na saray miyembro na teroristang Maute-ISIS ya walad loob na battle area diad Marawi City.
Saya et kasumpalan ya inamin na aareston Indonesian fighter ya si Mohammad Alham Shaputri ya saya so miyembro na Islamic State of Iraq and the Levant (ISIS) tan wala ni natitilak ya 39 Maute Group tan patuloy ya ungagalaw diad loob na main battle area.
Diad eksklusibon impituyaw na Bombo Radyo Dagupan ed kinen National Security Adviser Hermogenes Esperon Jr., imporek ton dati lan bilang so ibabaga nen Shaputri ya 39 so bilang na miyembro na terorista ya natitilak diad loob na warzone.
Inyarum tonin wala ray apatey ya Indonesian national ed say ginawan operasyon diad Marawi City tan wala ray naaresto metla bangbalet wala met iray pinapawil ya Indonesians diman ta miyembro ra na legit council manlapud Indonesia tan aliwa ran kalaban na gobyerno.
Impalapag to met ya walay listahan da na saray miyembro na Indonesian council kanyan anta da no siopa so kakampi na tropa na gobyerno tan siopa so miyembro na ISIS.
