Pormal nang sinimulan ng lokal na pamahalaan ng Bayambang ang pagdiriwang ng Kapaskuhan sa bayan sa pamamagitan ng Ceremonial Christmas Lighting.
Pinangunahan ni Mayor Niña Jose-Quiambao ang seremonya sa Municipal Plaza, kung saan tampok ang makukulay na Christmas lights at iba’t ibang dekorasyong nagbibigay-buhay sa paligid ng plaza.
Nakiisa rin sa naturang aktibidad ang mga residente at bisita upang saksihan ang taunang tradisyon na nagsisilbing hudyat ng pagsisimula ng mga pagdiriwang tuwing Kapaskuhan sa Bayambang.
Bukod sa pagpapaganda sa plaza, binibigyang-diin din ng selebrasyon ang tunay na diwa ng Pasko na nakasentro sa pag-asa, pagmamahalan, pagkakaisa at pagbibigayan.
Sa pamamagitan ng taunang pagdiriwang, muling nabibigyang-pagkakataon ang mga residente na magsama-sama at makiisa sa isang tradisyong nagbibigay-sigla sa komunidad tuwing Kapaskuhan.
