Posibleng hindi makasali sa kompetisyon ngayong taon sa Puerto Rico si Miss Universe Zimbabwe na si Roseanna Hall at ilang iba pang kandidata mula sa Africa dahil sa US visa restrictions.
Nakatakdang katawanin ni Hall ang Zimbabwe sa ika-75 edisyon ng Miss Universe pageant, kung saan kokoronahan ang mananalo sa Nobyembre 24. Gayunman, hindi pa rin siya nakakakuha ng visa upang makabiyahe sa teritoryo ng Estados Unidos.
“Nagpabalik-balik na kami at patuloy na sinusubukang maaprubahan ang aking visa,” pahayag ni Hall sa isang bidyong inilathala niya sa kaniyang Instagram account.
Hindi lamang si Hall ang kandidatong mula sa Africa na naapektuhan ng mga paghihigpit. Nagdesisyon ang Zambia na bawiin ang paglahok ng kinatawan nitong si Pamela Mubanga sa kompetisyon dahil sa mga restriksiyon sa paglalakbay patungong Estados Unidos.
Nagsimulang dumating sa Puerto Rico ang mga kandidata noong Nobyembre 8 para sa pagpaparehistro, pagsukat ng mga kasuotan, at iba pang aktibidad bago ang mismong kompetisyon. Dahil dito, lalo pang tumindi ang pangangailangan para kay Hall at sa iba pang kandidata, kabilang ang kinatawan ng South Sudan, na makakuha agad ng kanilang mga visa.
“Sa totoo lang, ngayon ang araw na dapat sana ay aalis na ako patungong Puerto Rico para sa ika-75 edisyon ng Miss Universe,” pahayag ni Hall.
Kabilang ang Zimbabwe sa 19 na bansang saklaw ng bahagyang paghihigpit sa paglalakbay patungong Estados Unidos sa ilalim ng Presidential Proclamation 10998, na nagkabisa noong Enero 1, 2026.
Sa ilalim ng mga hakbang na ito, sinuspinde ang pag-isyu ng mga visitor visa, student visa, exchange visa, gayundin ng immigrant visa para sa mga mamamayan ng mga apektadong bansa. Nagpatupad din ng mga paghihigpit sa iba pang kategorya ng non-immigrant visa.
