Tinupok ng sunog ang tatlong silid-aralan ng Camiling West Central Elementary School sa bayan ng Camiling, lalawigan ng Tarlac.
Agad na rumesponde ang mga tauhan ng Bureau of Fire Protection (BFP) Camiling matapos maiulat ang insidente, subalit tuluyan nang nasunog ang mga silid na ginagamit ng mga mag-aaral sa clinic, kinder, AT Grade 2.
Ayon kay Francisco Hernando, guro ng nasabing paaralan, hinihinalang faulty wiring o problema sa mga kawad ng kuryente ang pinagmulan ng sunog.
Wala namang naiulat na nasaktan sa insidente dahil nakauwi na ang karamihan sa mga mag-aaral bago sumiklab ang apoy, kasunod ng ipinatupad na half-day classes bunsod ng matinding init ng panahon.
Agad ding naapula ang sunog matapos ang mabilis na pagresponde ng mga lokal na bumbero.
Sa ngayon, kinakailangan pang matukoy sa pamamagitan ng masusing imbestigasyon ang tunay na sanhi ng sunog at masuri ang kondisyon ng electrical system ng paaralan upang maiwasan ang kahalintulad na insidente.
Samantala, inaasahang mabibigyan ng kinakailangang tulong ang mga apektadong mag-aaral at guro upang matiyak na magpapatuloy ang kanilang pag-aaral sa kabila ng pinsalang idinulot ng sunog.
