Dagupan City – Umarangkada na sa sampung pampublikong paaralan sa bayan ng Mangaldan, Pangasinan ang programang Bakuna Eskwela na naglalayong mapalawak ang proteksiyon ng mga mag-aaral laban sa ilang sakit na maiiwasan sa pamamagitan ng pagbabakuna.
Isinasagawa ang programa sa pangunguna ng Department of Health at Department of Education, katuwang ang lokal na pamahalaan sa pamamagitan ng Municipal Health Office.
Nagsimula ang pagbabakuna nitong Oktubre 26 at saklaw ang mga mag-aaral sa Gueguesangen Integrated School, David National High School, gayundin sa mga paaralang elementarya sa mga barangay ng Tebag, Nibaliw, Lanas, Maasin, Inlambo at Macayug.
Kabilang sa mga bakunang ibinibigay ang Measles-Rubella at Tetanus-Diphtheria vaccine para sa mga mag-aaral sa Grade 1 at Grade 7. Samantala, ang mga babaeng mag-aaral sa Grade 4 at Grade 5 naman ang target para sa Human Papillomavirus o HPV vaccine, na nakatutulong sa pag-iwas sa impeksiyong maaaring magdulot ng cervical cancer.
Hinikayat naman ang mga magulang at pamunuan ng mga paaralan na makipagtulungan sa pagpapatupad ng programa, partikular sa pagtiyak na may pahintulot at sapat na impormasyon ang mga mag-aaral bago tumanggap ng bakuna.
