Itinampok ng lokal na pamahalaan ng San Fabian ang mga serbisyong pampubliko at mga hakbang sa kaligtasan para sa nalalapit na paggunita ng Undas, sa isinagawang lingguhang flag-raising ceremony nitong Oktubre 26, 2026.
Kabilang sa mga serbisyong inilatag ng Tech4ED ang libreng gabay sa pagkuha ng mga dokumento mula sa Philippine Statistics Authority, passport appointment, mga transaksiyon sa SSS at GSIS, pagkuha ng TIN, business registration, police clearance, at tulong sa mga senior citizen. Nagbibigay rin ang tanggapan ng mga pagsasanay sa digital literacy at paggamit ng mga online na serbisyo ng pamahalaan, katuwang ang Department of Information and Communications Technology.
Samantala, pinaalalahanan ang publiko na tiyaking nakakandado ang mga tahanan, nakatanggal sa saksakan ang mga hindi kailangang kagamitang de-kuryente, at nakasara ang mga kalan bago bumiyahe. Pinayuhan din ang mga magulang na lagyan ng name tag na may contact number ang mga batang kasama sa sementeryo, habang hinihikayat ang mga bibisita na magdala ng sapat na tubig at payong dahil sa mainit na panahon.
Para sa mga motorista, mahalagang suriin muna ang kondisyon ng sasakyan bago bumiyahe upang maiwasan ang mga aberya sa kalsada. Binigyang-diin sa mga paalala ang kahalagahan ng maagang paghahanda at pag-iingat upang mabawasan ang panganib ng mga insidente at makatulong sa pagpapanatili ng kaligtasan ng mga pamilya at ng buong komunidad sa panahon ng Undas.
