Sumalang bilang unang testigo ng House Prosecution panel si Violeta Constantino, dating branch manager ng Land Bank of the Philippines (LBP) Shaw Boulevard branch, kaugnay ng misuse of confidential funds charges laban kay Vice President Sara Duterte sa pagpapatuloy ng impeachment trial ngayong Miyerkules, Hulyo 29.
Tumestigo siya para sa Article I ng impeachment complaint, patungkol sa umano’y maling paggamit ng ₱612.5 milyong confidential funds ng Office of the Vice President (OVP) at Department of Education (DepEd).
Kinumpirma ni Constantino na personal niyang pinangasiwaan ang pag-encash ng apat na tseke. Ang bawat tseke ay nagkakahalaga ng ₱125 milyon o kabuuang ₱500 milyon.
Ang mga tsekeng ito ay nakapangalan at kinuha umano ni Gina Acosta, ang special disbursing officer ng OVP. Naganap umano ang pag-withdraw sa pagitan ng Disyembre 2022 hanggang Setyembre 2023.
Hayagang sinabi ni Constantino sa Senate impeachment court na itinuturing na “unusual” o hindi pangkaraniwan ang pag-withdraw ng OVP ng ganoon kalaking halaga ng cash o P125 milyon kada transaksyon.
Ang direct examination kay Constantino ay pinangunahan ni House prosecutor at Manila Representative Joel Chua.
Matapos ang kaniyang testimonya, inihayag ng defense lawyer ni VP Sara Duterte na si Atty. Michael Poa na hindi na nila isasailalim sa cross-examination si Constantino.
Ang pagharap sa testigong si Constantino ay bahagi ng ika-10 araw ng impeachment trial ng Pangalawang Pangulo.
